【韓國國際賽】三港駒抽中外檔起步主要對手排內檔

競馬知舍

9月2日

讀畢需時 2 分鐘

三匹香港代表「自強不息」、「華麗再勝」及「美麗第一」將會喺今個星期日出戰三級賽韓國短途錦標，今早呢項泥地 1200 米賽事完成抽檔。

上屆冠軍「自強不息」抽得九檔，屬 16 駒出賽嘅中檔。該駒將會交由巫顯東攻堅。而上年策「自強不息」奪冠嘅周俊樂，今年就轉為策騎「美麗第一」出賽，該駒抽得 13 檔。

練馬師告東尼出席抽檔儀式，抽獲 13 檔後表示排喺外檔往往都唔容易應付，相信需要一啲運氣幫助先得。不過，佢相信「美麗第一」嘅前速可以為佢地帶黎好成績。另外，沈集成馬房嘅「華麗再勝」就抽得 16 檔，代表接受訪問時表示需要多啲運氣，希望可以於末段交出凌厲衝刺。

日本兩駒「美洲舞台」（American Stage）及 Dragon Welds就分別抽到 3 檔同 7 檔。自韓國短途錦標設立八屆以來，日本贏得當中四屆。「美洲舞台」近三仗雖跑草地，但佢曾於美國育馬者盃短途大賽跑獲殿軍，實力不容忽視。

去年韓國短途錦標第六名「駿必勝」（Vincero Cavallo）預計係主隊希望，佢會排喺 2 檔起步。今年專注 1200 米取得兩場頭馬，但七月出戰一班 1200 米卻大敗而回，狀態令人有所懷疑。而喺 5 月擊敗「駿必勝」嘅 Born Dia 及 Winner Clear 就分別排喺 14 檔及 8 檔起步。

另外，值得留意嘅係出自美國育馬者盃經典大賽冠軍 Knicks Go 嘅三歲雌馬 Knicks Go Won，該駒服役七戰五冠一亞，雖然頭馬都係低班賽取得，但日漸進步下，排喺 11 檔或成奇兵一路。