top of page
搜尋

【預賽當正賽跑】「生活格調」捧走中山紀念

  • 作家相片: 競馬知舍
    競馬知舍
  • 2分钟前
  • 讀畢需時 2 分鐘

返嚟日本戰報第一節，先睇年長馬賽事。


今個星期兩場年長馬重賞，頭馬都好啱用呢個大標題，先睇星期六中山1200米三級賽海洋錦標，賽前Tony叫大家留意兩匹高松宮紀念參賽馬，包括Invincible Papa (佐佐木大輔)、「純魔法」(橫山和生)，加埋準備去杜拜嘅「賢德之君」(鮫島克駿)，結果近乎全軍盡墨，「純魔法」放完兩段收工，Invincible Papa直路亦都跟到散咗，「賢德之君」一度突圍，後面「巨星配對」(岩田康誠)、Rapier (戶崎圭太) 一對沿內檔殺上，「巨星配對」去到終點前及時出頭，率先出線；此駒上年都係喺一級賽前哨上名，靠收得獎金先成功入圍，去到正賽就影都唔見，高松宮紀念恐怕凶多吉少。「大海女神」(川田將雅) 追足一條直路都捉唔到「賢德之君」，戰鬥力未算退化，不過叫易位難贏，以佢今仗表現，正賽最多只係爭上名而已。

 

星期日中山上演1800米二級賽中山紀念，「生活格調」(戶崎圭太) 出戰根幹路程 (1600/2000/2400)表現麻麻，返到去「非根幹路程」(1800/2200)，表現特別醒神，今仗跑來幾乎一步不蝕，直路喺「魔神星雲」(幸英明) 同「潛心鍛煉」(橫山武史) 中間穿插而上，輕勝而回，連續4年贏出二級賽；老實講，日本非根幹路程一級賽少得可憐，呢類馬唯一出路可能就係出國，杜拜草地應該搵佢去跑！年頭贏完中山金盃 (三級賽) 嘅「歡快舞步」(津村明秀) 直路追得唔錯，臨門反先「潛心鍛煉」，個頭開得好，不過稍後春季三冠撞正中東組落嚟搶錢，級數有別，行情少少淡。

 

嚟到退休騎練最後一次出賽嘅中央賽日，除咗根本康廣、藤岡佑介都有馬贏之外，國枝榮亦有頭馬進帳，今次嘅精選賽事就睇佢從練生涯最後一場頭馬，星期六阪神4歲以上3勝3000米松籟錦標，「夏威夷鳥」之子「青鳥」(岩田望來) 面對上年春季錦標 (二級賽) 季軍「飆風王」(坂井瑠星)，兩匹POG參戰馬賽前票數不相上下，全程一放一追，去到三四彎角左右開始，幾乎單打獨鬥，直路「青鳥」見岩田望來再推一段，反應相當好，「飆風王」全無還擊之力，以2個馬位取勝；「青鳥」賽後會轉至橋田宜長馬房繼續服役，稍後部署春季天皇賞，亦可留意。

 

Photo: 賽事截圖


==============================

Telegram公海：https://t.me/GoldRacing

 
 
 

留言

bottom of page