【食過番尋味】Mystery Way阿根廷盃大逃得手

競馬知舍
11月12日
讀畢需時 1 分鐘

日本戰報第一節，繼續同大家睇咗古馬戰線先。

星期日兩場年長馬重賞，先睇東京2500米二級賽阿根廷盃，9月喺札幌出戰丹頂錦標使出大逃跑法得手嘅Mystery Way (松本大輝)，重施故技，早段一度放離六七個馬位，其後回氣再上，末段成排馬一齊湧上嚟，仍難越雷池半步；Stinger Glass (李慕華) 排18檔可以話一大敗筆，早段焗住留後，跟住慢慢逐步上返中間位置，開個第二快末段，追足一條直路都捉唔到，稍後跑返二三級賽，形勢好返少少，可望補中；「利森名園」(貝知仁) 呢組揹59.5公斤明顯讓唔起，對大局冇威脅，做完喉嚨手術之後未復舊觀。

另一組京都泥地1800米三級賽京都錦標，大久保龍志一對分列大次熱門，個個都留意Outrange (松山弘平)，相對睇低W Heart Bond (坂井瑠星)，結果就比冇份出戰JBC雌馬經典賽嘅後者喺呢組跌咗個橙執番個桔，比佢早段搶到頭，同對手同時領放，去到三四彎角一踩油，率先透出，以1:47.5打破場地紀錄；去完韓國盃一對「飆速引擎」(三浦皇成)、「盡得真傳」(杜滿樂)，分列四五位完成，表現叫做好過同日復出嘅「禪勝輝煌」，不過實力止步於此，去到冠軍盃似乎難言爭勝。