【唔係轉播賽】「博物街」「揮盾攻擊」聖烈特紀念聯手包Q

競馬知舍
9月17日
讀畢需時 2 分鐘

返嚟日本戰報上半場，又係睇古馬賽事時間。

入正題前先講兩匹遠征歐洲嘅馬戰情，同樣係知舍POG參戰馬，表現一個天一個地，星期六喺愛爾蘭冠軍錦標登場嘅「真命新帝」(坂井瑠星) 頭段放唔出嚟都知凶多吉少，入到直路固然企喺度；星期日就到去咗法國嘅「北十字星」(北村友一) 出戰三級賽奧蘭治太子錦標，狀態未十足，大半條直路出錯腳，都能夠力拒「得令星」(巴米高) 來犯取勝，過程少少艱辛，值唔值得開香檳大家建議問一問Roy哥。4匹喺歐洲嘅日本馬表現都睇過一次，睇落最對辦都係「帝國夢」，有氣量根據，福伊錦標一役喺劣勢下都追得返上嚟贏埋，莫艾誠發揮拍爛手掌，相信有呢位跑慣歐洲步速前慢後快嘅好手幫助，正賽爭勝機會睇高一線。

星期六阪神上演2000米三級賽挑戰盃，事隔14年再一次安排返喺9月舉行，不過有別過往，冇咗「朝日」牌頭 (2014年已經冇)，比賽條件亦由平磅罰則轉為讓磅；2匹良血POG包辦一Q，新勝升班嘅Grande Venus見川田將雅都發揮得一絕，不過都要衰喺莫雷拉手上，睇吓Allnatt直路偷入內欄殺上嚟，門前一劍封喉，精彩！

星期日阪神3歲馬女限定1800米二級賽玫瑰錦標，橡樹季軍Tagano Abby (藤岡佑介) 臨場退出，得返17匹馬爭最後3張秋華賞入場劵，橡樹盟主Kamunyak (川田將雅) 復出為秋華賞熱身，順利拿下；熱門份子一撞正今場快步速，就全面失準，剩低兩個位由Teresa (松山弘平) 同Sena Style (岩田康誠) 拎走，後者去到正賽特別要留意，直路沿馬群左穿右插，及時趕到，表現出色。

星期一中山3歲限定2200米二級賽聖烈特紀念，上年轉播賽日2歲賽黃菊賞條Q事隔近一年都開得返，皐月賞盟主「博物街」(戶崎圭太) 一早講明唔跑菊花賞，借呢場備戰秋季天皇賞，末段輕鬆反先「揮盾攻擊」(橫山典弘)，變相宣佈菊花賞多一個獎金位，後駒上仗越級挑戰2勝班得手，今仗對返同齡馬幾乎贏埋，實力高唔止一班，正賽亦有力一爭；最後一席就由Red Bande (佐佐木大輔) 拎埋，反觀「祝福花環」(莫雷拉) 今場意外多多，閘前搞搞震，被罰最外檔入閘，全程走大圈，結果包尾而回。