【再被討論】「格倫島」繼續到處征戰 再有聲音讓閹馬出戰凱旋門大賽
- 競馬知舍
- 4天前
- 讀畢需時 2 分鐘
「格倫島」（Calandagan）上星期六順利捧走杜拜司馬經典賽冠軍，為其2026馬季帶黎好開始。其動向依舊為馬迷注目。
「格倫島」馬主阿加汗牧場賽馬經理 Nemone Routh 日前接受 Nick Luck Podcast 訪問時表示為該駒感到高興。畢竟從日本回到法國後，佢一度增重超過20公斤，令幕後一度擔心其狀態。當接近杜拜司馬經典賽時，體重稍為回落，但仍然比往出賽時偏重。
對於「格倫島」之後嘅部署，Nemone Routh 就表示佢地現時未有詳盡計劃。現時喺佢地嘅計劃上，衛冕英皇錦標一定喺佢地計劃之中。不過，佢地唔會安排「格倫島」喺杜拜司馬經典賽後，直接出戰七月底上演嘅英皇錦標，將會安排一至兩場賽事比佢熱身，現時「格倫島」將會從杜拜運回法國小休，相信來港機會較低。至於佢會以咩賽事作熱身，同主馬兼凱旋門大賽冠軍「得令星」（Daryz）或會比到啲眉目大家，Nemone Routh 透露唔會安排兩駒對決，意味著「得令星」專注法國戰線嘅話，「格倫島」就大機會喺法國以外出戰。「得令星」暫時會喺法國一級賽根利錦標作季內初出。
至於一級賽英皇錦標後，因為身為閹馬嘅「格倫島」唔能夠出戰凱旋門大賽，意味著佢將繼續喺法國以外地區出戰。唔少賽馬地區落足口水邀請該駒遠征，當中三項一級賽，澳洲上演嘅一級賽覺士盾、美國上演嘅一級賽育馬者盃草地大賽及其去年奪冠嘅一級賽日本盃都成為其目標之一。
覺士盾因為滿利谷馬場裝修，將會轉到費明頓馬場上演。Nemone Routh 就話「格倫島」可能應付唔到滿利谷馬場，但喺費明頓馬場嘅話相信就無問題。佢指出雖然「格倫島」近兩仗都係跑2400米，但佢就相信2000米都唔會影響「格倫島」發揮，反而係馬場先會有影響。不過 Nemone Routh 都話要同阿加汗牧場主人 Princess Zahra Aga Khan 商討後先有決定。
「格倫島」繼續稱霸哩半路程，有部分人就要求法國馬會考慮比閹馬出戰凱旋門大賽，當中英國傳媒人Matt Chapman 於其專欄表示凱旋門大賽需要「格倫島」，令該項賽事保持地位。佢就話唔少人認為唔比閹馬出戰凱旋門大賽係因為該項大賽為雄馬轉為種馬加分嘅大賽，因此閹馬唔應該出戰。不過，佢就認為如果一匹雄馬可以喺該大賽擊敗一匹公認實力強勁嘅閹馬，將會加更多分。因此，唔比閹馬出戰並不合理。佢就提議閹馬如果要出戰凱旋門大賽，就要負更重嘅磅，例如三歲閹馬要比三歲雄馬負多三磅、四歲或以上閹馬要比雄馬負多五磅等。雖然如此，法國馬會暫時未有消息指會檢討凱旋門大賽嘅出賽制度。
Source: Nick Luck Podcast, The Sun,
Photo: Dubai Racing Club
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言