【消失三周】年輕好手高杉吏麒缺陣三星期謠言四起
- 競馬知舍
- 8月11日
- 讀畢需時 2 分鐘
現年 20 歲嘅日本騎師高杉吏麒於 7 月 19 號上陣後就未有上陣，至今已三星期未有坐騎。佢原本隸屬藤岡健一馬房，但上星期四轉為自由身騎師。由於未有因傷缺陣消息、突然轉為自由身騎師及日本傳媒毫無報導等因素，引起不少猜測。
高杉吏麒於 2024 年出道，首季以 48 場頭馬成為最佳新人騎師。第二年取得 74 場頭馬，累積取得超過 100 場頭馬，順利畢業。今季佢暫時取得 38 場頭馬，位列騎師榜第 17 位。得勝率一直保持喺 9 至 10 %，為近年日本受注目嘅年輕騎師之一。
高杉吏麒於 7 月 25 號果一個星期起就未獲坐騎，亦沒有任何受傷嘅消息，情況令人擔心。三星期以來，未有任何一個日本傳媒報導有關情況，各種「可靠消息」亦隨之於網上發酵。最初說法指佢因為賴床而未有出席晨操，引致其師父藤岡健一不滿，結果禁止佢出賽。因此，佢喺 7 月 19 號起就未有上陣。
一個日本晨操消息網站表示高杉吏麒缺席晨操當日，原本要出跳多匹馬，其中仲要同資深騎師川田將雅拍跳。其後前騎師藤田伸二於其個人頻道透露高杉吏麒之所以缺席晨操，因為前一晚飲醉酒，以致未能按時起床出席晨操。佢同時指出練馬師藤岡健一性格溫和，亦容易相處。藤田伸二聲稱高杉吏麒於得悉被師父罰停賽後，提出離開藤岡健一馬房，轉為自由身騎師，最後兩人分道揚鑣。
藤田伸二透露高杉曾涉及未成年飲酒，當地法例規定需年滿 20 歲先可以飲酒，否則即屬違法。同時佢亦曾捲入函館競馬場汽車闖入跑道事件，盛傳當時於角田大和車內嘅人就係高杉吏麒。另外，高杉吏麒亦曾因為不適用使用手提電話而被罰停賽。藤田伸二聲稱藤岡健一對馬主嘅信件中表示：「這種本性頑劣嘅人，無論如何引導都無補於事。」，反映藤岡健一對高杉吏麒失望。
以上都係網上嘅傳言，至今仍未有日本傳媒報導有關消息。唯一可以肯定嘅係，高杉吏麒現時為自由身騎師，不隸屬任何馬房。暫未知佢會否喺今個星期復出策騎，但即使可以上陣，有幾多練馬師比馬佢騎都係未知數。值得一提的是，藤田伸二為角田大和離世消息公布前，率先透露死訊嘅人之一，因此其論述可信性有一定參考價值。
而如果高杉真係涉及於未成年期間飲酒，相信會得到 JRA 方面懲罰。早前另一位年輕騎師橋木太希因「重大違規」而被罰停賽一年，當時 JRA 表示因橋木太希未夠 20 歲未有公布原因。然而，當時網上普遍指佢因未成年飲酒而被罰。如高杉吏麒同樣被查出未成年飲酒，相信都會被罰，且看之後會唔會繼續有公布。
Source: The Audience, 藤田伸二
Photo: 訪問截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言