【潘頓咁講】如果「嘉應高昇」今個星期六好似上週試閘咁我地就麻煩了
- 競馬知舍
- 10月15日
- 讀畢需時 2 分鐘
香港馬王「嘉應高昇」今個星期六將會出戰珠穆朗瑪峰錦標，自「嘉應高昇」落實出戰後，到佢抵達當地，然後試跑及試閘，一舉手一投足都成為當地賽馬媒體焦點，甚至謠言都衝佢而來。
所以當地唔少媒體都集中訪問「嘉應高昇」團隊，無論練馬師大衛希斯及騎師潘頓都不斷被訪問無數次。潘頓今日又接受澳洲傳媒訪問，再次談及10月7號果一課蘭域試閘，佢就話果課試閘並非真正嘅「嘉應高昇」，佢當日試閘後並無餘力，覺得該駒喺近兩年半來最失望嘅表現。如果「嘉應高昇」去到星期六仲係保持住呢個狀態，佢相信「嘉應高昇」唔能夠贏得珠穆朗瑪峰錦標。
被問及點解會對「嘉應高昇」當日表現感失望時，佢就從幾個方面解釋。首先佢就話希斯為「嘉應高昇」增重以應付長途機帶黎嘅跌磅，但事實上「嘉應高昇」並無大跌磅，因此於試閘時體能上並非十足。加上「嘉應高昇」於沙圈時已經十分緊張，不斷冒汗，與香港作賽時甚為不同。而喺試閘中，「嘉應高昇」並未有集中角逐，只係四處張望。潘頓就話如果正賽當日，「嘉應高昇」依然如此，佢地將會有好大麻煩。
不過，練馬師大衛希斯就話「嘉應高昇」喺試閘後有好大進步，包括試跑表現出色及體重回到香港作賽時水平。唯一擔心相信喺蘭域馬場當日人潮所帶來嘅影響，不過希斯就話當日會盡量避免「嘉應高昇」感到緊張，考慮讓賽駒留喺後園準備。
潘頓自試閘後一早提出「嘉應高昇」嘅隱憂，彷彿話比大家知香港馬王呢一戰唔容易，亦非贏硬。有部分馬迷就覺得呢課試閘係「遇強即屈，借花敬佛」，有部分就覺得「嘉應高昇」呢課試閘盡顯狀態不足，有機會因此未能趕及喺珠峰錦標前將狀態推至頂峰。你又覺得如何呢？
Source: SENTrack
Photo: SENTrack
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言