【邊個阻到三冠？】「洛夫琴山」神戶新聞盃險勝
嚟到日本戰報，今期睇6場賽事。
今個星期撞正日本假期，原先安排三日馬，不過因為關東打風，星期一中山賽事延遲一日舉行，變咗四日有馬跑。先睇星期日中山二級賽2200米產經賞，三勝一級賽嘅「蕾麗宮」(戶崎圭太) 同上年一樣借今場熱身，只係賽前見到薯仔地，都知凶多吉少，落到場亦未能威脅大局；反觀半途出家轉戰跳欄賽，再回師重賞報捷，更為罕見，講緊就係「名將衝冠」(田邊裕信)，同樣都係早年轉播賽事已經亮相 (註)，輾轉至今年初先從條件賽畢業，突然畫風一轉，連跑兩場跳欄賽，無功而回之下，唯有返去平地賽行列，沿途主宰戰局，直路越騎越有，吊住佢尾嘅Can’t Wait (橫山典弘) 去到最後100米如狼似虎追上去，一齊衝線，結果影相影贏個馬鼻；同場騎「六月豪取」嘅武豊，眼見佢變化地跑得咁好，跑完即刻搵笹田和秀咬耳仔，下年凱旋門搵佢跑有冇得諗？老實講句，去到8歲先諗凱旋門，對住一班後起之秀，恐怕有少少吃力，幕後即使有咁嘅諗法，到時應該係戥腳居多，有前半版返嚟都當你贏。
星期一阪神上演3歲限定2400米二級賽神戶新聞盃，二冠馬「洛夫琴山」(松山弘平) 擺下擂台，捧成1.4倍大熱，幾乎炒車，早段留喺馬群中間，慢慢移出外疊，直路抄出去追一段，門前及時將「昇之藤」(岩田望來) 擒下，雖然a win is a win，不過贏得咁驚險，最後一關相信危危乎；Sea to Summit (酒井學) 對面直路開始上前放頭，一路放到末段仲有兩腳，保住一席季軍，拎走最後一張入場券，Tony講足一屆、身價將近6億嘅「自家開端」，搵到武豊幫手，梗係搏至少一個第3，殺入菊花賞，至少血統應付到哩半以上，早段明顯脫節，直路拍住「洛夫琴山」一齊上，開頭似模似樣，點知最尾幾步先嚟腳軟，送走出線資格，論馬同武豊相當夾，稍後落班再配搭，仍可留意，相信下年會係馬房大賽主力。
星期六中山有一組3歲以上2勝2500米九十九里特別，個別有潛力出戰菊花賞嘅3歲馬都會上陣，留意呢匹King Glory (丹內祐次)，放足大半程之下，以1 1/2馬位輕勝，幕後隨即宣佈出戰菊花賞，不過呢組頭馬去到菊花賞年年都係講一隻「密州怨曲」，整體成功率唔高，再加上同樣嚟自2勝班嘅對手實力強橫，到時最多邊線份子而已；知舍POG叫三飛全軍覆沒，當中包括「杏目」大仔Aaron’s Rod (李慕華)，雖然末段都追一段比大家睇，收返少少獎金，但係中山同黏地似乎唔係太啱佢發揮，去返東京哩半出頭機會點都大啲。
2歲組方面，首先去到星期六中山頭場泥地1800米未勝利賽，大熱門Winter Breeze (李慕華) 為1.4倍大熱，早段跟住第二位，未轉彎撳住都已經出頭，不用推騎收韁輕取三個馬位，以1分50秒正打破2歲馬紀錄。Winter Breeze出自「強版查理」，半兄為2025年阿聯酋打吡得主「喜飆速」(Admire Daytona)，乍看是泥地血統，但出道前兩戰跑草地皆取得亞軍，第三戰轉到泥地輕勝而回，按部署JBC 2歲優駿跑得好的話，下年年初極有可能中東見。
轉到星期日阪神雌馬限定草地1600米新馬賽，Miranda Smile (岩田望來) 沿途外疊望空走，直路騎落去馬上透出，以一又四份一馬位勝出。Miranda Smile父系「金之霸」，外祖母為名雌馬「大和赤驥」，雖然戰績彪炳，但產駒子孫表現僅止於條件賽，可以一出即勝證明還是有一定質素，長遠跑更長距離應會更適合。
知舍POG只有一駒交出頭馬，星期一阪神草地1800米新馬賽，賠率上為Shihono Nobile (岩田望來) 和King Lear (川田將雅) 雙頭馬車，沿途King Lear一直緊跟Shihono Nobile身後，入直路兩匹馬單打獨鬥，最後200米趕過對手，以一個馬位勝出，為Hawaii、Gordon、Jason、Ryan、卓爾達及Edward六位玩家增加780分，同場另一POG，前田家名下、古摩亞出品的Hanana (坂井瑠星) 以第六名完成。King Lear父系出自「神威啟示」，為母系「麗雅美」的第一胎，「麗雅美」曾勝出2020年玫瑰錦標，同樣在中內田川田組合下成為當年雌馬戰線實力馬之一，只要不像媽媽那樣難操控的話，將會是接下來兩歲三歲賽的焦點之一。
註：此子早於2021年女皇伊利沙伯二世盃賽日嘅黃菊賞 (2歲1勝) 中，已經亮相，當時跑獲亞軍，頭馬「駿天宮」其後贏出春季天皇賞 (一級賽)，季軍「佳日」就喺今年5月贏出新潟大賞典 (三級賽)；其後於2023年同一賽日，出戰3歲以上2勝賽事，同樣跑入亞軍，頭馬係同樣喺今場上陣嘅「美扉」。
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言