top of page
搜尋

【翻版T】「地神力」富士錦標反勝「遠觀天象」一回

  • 作家相片: 競馬知舍
    競馬知舍
  • 2025年10月22日
  • 讀畢需時 2 分鐘

返嚟日本戰報，今次一次過同大家睇4場賽事。


星期六睇緊澳洲轉播賽期間，東京上演1600米二級賽富士錦標，安田紀念三甲一齊復出再鬥過，再一次包辦三甲，不過三重彩就要扭一扭，「遠觀天象」(川田將雅) 排14檔出閘，全程三疊望空，拍住「地神力」(橫山武史)，轉入直路兩屏駒單打獨鬥，「遠觀天象」居然冇一步過到頭，「地神力」冇罰磅影響之下，佔盡上風，取得久違勝仗，「神志勇進」(團野大成) 安田一役都係輸「遠觀天象」大約個半馬位，今次再跑，稍為拉開少少，輸2個幾馬位，連第3都幾乎不保，明顯走緊下坡，年尾兩場大賽相信係為面子而戰；再對比沙田錦標，「祝願」一早較定炮贏兩場讓磅賽，係咪keep得住個狀態去到12月係有疑問；「遨遊氣泡」人馬都未瞓醒，當冇跑過，年尾一哩錦標似係今場三隻對「遨遊氣泡」，日本馬贏面都係審慎樂觀。


精選賽事就睇吓星期日新潟馬女限定2200米表列賽新潟牝馬錦標，留意絲綢會一口馬「巧玲瓏」(Canela Fina，石川裕紀人)，秋華賞抽選唔入，轉去細場對年長馬女，一樣得手，直落4連勝，睇吓有冇潛力做到下一匹「吉典娜」。


知舍POG比賽組出馬眾多，只得2駒報捷，星期六東京未勝利1800米，睇吓下河邊牧場出品、由「野田」系自行購入嘅「鐵鳥翱天」子嗣Danon Cefiro (川田將雅)，8月喺中京初出跑入亞軍之後，小休一輪，轉嚟呢組未勝利場合，全程三疊望空，看似相當不利，入到直路初段，仲落後前面四五個馬位，不過隻馬由左腳一轉正腳，追勢相當凌厲，門前及時將沿途領放嘅La Guairita (津村明秀) 擒下，幫Homan、Ramos等5人賺560分。


同日東京另一組1800米表列賽常春藤錦標，7匹馬嘅場合，4匹POG對3匹安全車，冇咗「創世駒」第一胎Bereshit呢匹大船，都仲有另一匹大船成功開出，就係社台一口馬Anduril (川田將雅)，話就話沿途守住第2位，實際前面有馬大逃，基本上即係自己放，轉入直路自動波湧上去，一鞭未開，率先突圍，末段稍為推騎兩步，保持專注，以1個馬位取勝，姿態輕鬆，幫11人賺1700分。


Photo: 賽事截圖


==============================

Telegram公海：https://t.me/GoldRacing


 
 
 

留言

bottom of page