【賺完千一再賺三千八】Dream Core勇奪皇后盃
- 競馬知舍
- 2月18日
- 讀畢需時 2 分鐘
開年都有日本戰報陪大家，第一節先睇星期四同星期六賽事，集中火力睇知舍POG。
星期六沙特盃賽日，POG古馬組「真命新帝」(坂井瑠星) 喺升格為一級賽嘅新未來城草地盃衛冕失敗，起步放唔出都知出事，好在末段點都追返一段比你睇，Tony感覺發揮未盡全力，唯有寄望過嚟香港擒下「浪漫勇士」；比賽組有「里見航行」(戶崎圭太) 出戰沙特打吡，戰至直路初段，一路按韁，以為大把在手嘅時候，比主隊「神聖禁地」(方銳拿) 一口氣橫掃不特止，仲要比全程放頭、直路一度轉弱嘅「全面殲敵」(羅沙理奧) 反先返，似乎東京一哩勝仗都係靠級數殺晒，真係遇到美式步速，又係另一回事，睇完今場落返千四似乎更好。
轉返嚟日本，星期六得一場平地重賞，東京馬女限定三級賽1600米皇后盃，睇吓「樸素無華」之女、社台共有馬Dream Core (李慕華)，上年尾贏完東京賽期一場1勝特別之後休息至今，沿途坐住boxseat，一步不蝕，直路頭一度被對手封位，等到最後200米左右有位望空，喺Zippy Tune (北村友一) 同His Masterpiece (佐佐木大輔) 中間穿插而上，奠定勝局，幫9個人賺3800分；大熱門、阪神2歲雌馬大賽亞軍Garavogue (川田將雅) 想用返上場後追跑法，不過遇上偏慢步速就不太奏效，末段走勢亦不太規矩，跑到頭側側，試馬成份居多，睇吓櫻花賞又會唔會見真章。
比賽組仲有3駒贏馬，先係東京未勝利1600米泥地一組，「Realize系」今福洋介今期當旺，除咗Realize Sirius同Realize Glint喺重賞戰線分途報捷之外 (留待第二節報導)，仲有一匹Realize Tachyon (金美琪) 苦戰至今終於開齋，沿途同對手一齊領放，直路初段已經出頭，金美琪一路大鞭車落去，保持優勢返嚟，幫Gordon賺590分；大熱Inazuma Daimon (川田將雅) 起步慢咗，唯有沿外檔上前推進，直路上對住Realize Tachyon，落後兩三個馬位之下，冇一步威脅到，去到門前先稍為追近，收回一席亞軍，出道至今5仗名次冇變過，幫Davi賺240分。
另一場東京未勝利馬女限定1800米，「青春永駐」成功衛冕沙特盃，賽前就有佢阿妹落場幫手造勢，講緊就係Sunday會一口馬、上線出自「神威啟示」嘅Darlinghurst (金美琪)，早喺上年6月已經喺一組一哩賽事中初出，跑入一席季軍，之後因傷影響進度，延至今期復出，沿途跟實第2位，直路率先透出，另一匹Sunday會一口馬Shinyanga (李慕華) 追足一條直路，都埋唔到身，末段贏到收晒韁返嚟，以2 1/2馬位優勢掄元，幫12個人賺590分。
地方賽事就睇星期四姬路一場3歲C2組1400米，留意初出嘅Sky no Haru (廣瀨航)，早段前速唔算快，留喺馬群中間位置，大約第6位左右，半程過後開始發力，入直路直情撞一撞對手、攝入內欄衝一段，順利反勝，幫彭國年賺60分。
Photo: 賽事截圖
==============================
Telegram公海：https://t.me/GoldRacing
YoutubeChannel：https://www.youtube.com/c/GoldracingHK競馬知舍
Instagram：https://www.instagram.com/gold.racing/
Rakosell：https://goldracing.rakosell.com/
FacebookPage：https://www.facebook.com/HKGoldRacing
留言